2016 թ. ռազմական հեղաշրջումից հետո Թուրքիայի զինուժում ռազմական օդաչուների պակասը լրացնելու համար բանակցում են Թուրքիայի ռազմական և քաղաքացիական ավիացիայի ներկայացուցիչները: Թուրքիայում առաջացել է օդաչուների ընդհանուր պակաս, և զինուժը համալրելու դեպքում արդեն քաղավիացիան կունենա օդաչուների պակաս: Այս մասին հայտնում է թուրքական «Դողան» գործակալության կայքը:
Նմանատիպ խնդիրներից խուսափելու համար արդեն մի քանի ամիս է, ինչ Թուրքիայի ԶՈւ ռազմաօդային ուժերի հրամանատարությունը բանակցություններ է վարում Թուրքիայի քաղավիացիայի ընկերությունների հետ:
2016 թ. ռազմական հեղաշրջման փորձից հետո հատկապես տուժել էին Թուրքիայի ռազմաօդային ուժերը, հեռացվել էր ռազմական օդաչուների զգալի մասը: Հետագայում թուրքական զինուժը հայտարարել էր նաև քաղավիացիայից նախկին ռազմական օդաչուների ընդունելություն, սակայն այս դեպքում խնդիրներ էին ունենում նաև քաղաքացիական ավիացիայի ընկերությունները: Այսպիսով ներկայում այդ քաղաքականությունը դեռևս շոշափելի արդյունքներ չի տալիս:
Այդ իսկ պատճառով ներկայում քննարկվում է թուրքական զինուժից քաղավիացիա անցած, համեմատաբար երիտասարդ օդաչուներին ժամանակավորապես ռազմաօդային ուժեր վերադարձնելու հարցը: Նրանք պետք է այդ ընթացքում հիմնականում զբաղվեն նոր կադրերի պատրաստությամբ:
Ծրագրի երկրորդ փուլում կիրառվելու է ԱՄՆ-ում գործող «պահեստազորայինի» համակարգը: Այն է՝ ժամանակին պարտադիր ծառայությունը անցած և ներկայում արդեն քաղավիացիայում աշխատող պահեստազորի օդաչուները պետք է 1 տարով վերադառնան ծառայության: Վերջիններս այդ մեկ տարվա ընթացքում պետք է վերականգնեն իրենց հմտությունները ռազմական ավիացիայի ոլորտում, իսկ այնուհետև՝ կրկին վերադառնան քաղավիացիա: Պատերազմական իրադրության դեպքում այդ օդաչուները կզորակոչվեն:
Ավելացնենք, որ դեռ 2016 թ. նոյեմբերի 18-ին, անդրադառնալով Թուրքիայի ռազմաօդային ուժերում օդաչուների պակասին, թուրքագետ Լ. Հովսեփյանը մեզ հետ զրույցում նշել էր, որ այդ պահի դրությամբ ռազմական օդաչուները պահանջվածից 2.5-3 անգամ ավելի պակաս էին: