Ապրիլի 13-ին Սիրիայի ԶՈւ հրամանատարությունը հայտարարել է, որ Դեր Զոր քաղաքին ԱՄՆ գլխավորած միջազգային կոալիցիայի՝ ապրիլի 12-ին իրականացրած ավիահարվածի հետևանքով ոչնչացվել է ԻՊ քիմիական զենքի պահեստ: Պահեստից բարձրացել է դեղին ծուխ, մոտակա թաղամասերում թունավորումից սպանվել են հարյուրավոր մարդիկ: Այս մասին հայտնում է Սիրիայի կառավարական SANA լրատվական գործակալությունը:
ԱՄՆ գլխավորած կոալիցիան դեռևս չի մեկնաբանել այս հայտարարությունը:
ԱՄՆ Միջերկրականից հարվածել է Սիրիայի կառավարական ուժերին (արխիվ)
Հիշեցնենք, որ ըստ ԱՄՆ գլխավորած միջազգային կոալիցիայի՝ շուրջ 60 մարդ էր սպանվել ապրիլի 4-ին Սիրիայի հյուսիսարևմուտքում ընդդիմադիր ուժերի վերահսկած Խան Շեյխուն քաղաքում քիմիական գազի կիրառման հետևանքով: Սակայն Ռուսաստանը և Սիրիան պնդում են՝ ապրիլի 4-ին Սիրայի օդուժը ավիահարվածներ է հասցրել Խան Շեյխուն քաղաքում ահաբեկիչների զինտեխնիկայի կուտակումների և զինպահեստի, որտեղ պահվում էր քիմիական զենք, ոչ թե կիրառել է քիմիական զենք:
Այս ամենին հետևել էր ապրիլի 7-ին ԱՄՆ ռազմածովային ուժերի երկու ռազանավից Սիրիայի ԶՈւ «Շայրաթ» ավիաբազայի վրա 59 միավոր թևավոր հրթիռ արձակելը։ Դոնալդ Թրամփը հայտարարել էր, որ իրենք «Սիրիայի կառավարական ուժերին հարվածել են ի պատասխան օրերս Իդլիբում նույն կառավարական ուժերի կողմից բնակիչների դեմ քիմիական զենք օգտագործելուն»։ Ավիաբազան ԱՄՆ-ի արձակած հրթիռների հետևանքով նյութական կորուստներ է ունեցել:
Սիրիայի Հոմս նահանգի ավիաբազան ԱՄՆ զինուժի հարվածներից հետո. ապրիլ 2017թ.
ՌԴ ՊՆ պաշտոնական ներկայացուցիչը հայտնել էր, որ «Շայրաթ» ավիաբազայի վրա ԱՄՆ զինված ուժերի արձակած 59 հրթիռներից տեղ է հասել միայն 23-ը, ինչի արդյունքում ոչնչացվել է վերանորոգման անգարներում գտնվող Սիրիայի ՌՕՈւ 6 միավոր Միգ-23 կործանիչ, ռադիոտեղորոշիչ կայանը և ուսումնական կենտրոնը: